എപ്പോഴും നല്ല തിരക്കുള്ള പന്തളം കവലയിൽറോഡിലെ വരകൾ മാഞ്ഞു; എവിടെക്കൂടി മുറിച്ചുകടക്കും
പന്തളം : എപ്പോഴും നല്ല തിരക്കുള്ള പന്തളം കവലയിൽ റോഡ് മുറിച്ചുകടക്കേണ്ടത് എവിടെ എന്നറിയാതെ ജനം വലയുമ്പോൾ, വാഹനം നിർത്തേണ്ടസ്ഥലം അറിയാതെ വാഹനം ഓടിക്കുന്നവരും ചുറ്റുന്നു. പന്തളം കവലയിലെ സീബ്രാലൈനുകളെല്ലാം മാഞ്ഞുപോയിട്ട് നാളുകളായി.
പോലീസ് ഡ്യൂട്ടിക്കുണ്ടെങ്കിലും സിഗ്നൽ സംവിധാനം നോക്കിയാണ് യാത്രക്കാരും വാഹനം ഓടിക്കുന്നവരും കടന്നുപോകുന്നത്. ആദ്യമായി എത്തുന്നവർക്ക് ഏതുവഴി റോഡ് മുറിച്ചുകടക്കണമെന്നറിയാൻ പ്രയാസമാണ്. വാഹനം സിഗ്നലിൽ നിർത്തേണ്ട വരകളും റോഡിന്റെ അരികിൽ വാഹനം നിർത്താനുള്ള അതിർവരമ്പുകാണിക്കുന്ന വരകളും മാഞ്ഞുകഴിഞ്ഞു.
സീബ്രാലൈനില്ലാത്തതിനാൽ പന്തളം-മാവേലിക്കര, പന്തളം-പത്തനംതിട്ട റോഡുകളിലും എം.സി. റോഡിലും തോന്നുന്ന സ്ഥലത്താണ് വാഹനങ്ങൾ നിർത്തുന്നത്. കുളനട ടി.ബി. കവലയിലും മെഡിക്കൽമിഷൻ കവലയിലും വരകൾ മാഞ്ഞുപോയിട്ടുണ്ട്.
zebra line
