അടൂർ : എംസി റോഡിൽ മിത്രപുരം അരമനപ്പടിക്കുസമീപം പിക്കപ് വാനും മിനി ടെമ്പോയും കൂട്ടിയിടിച്ച് മൂന്നുപേർക്ക് ഗുരുതര പരിക്ക്. മിനി ടെമ്പോ ഡ്രൈവർ കട്ടപ്പന പുല്ലാന്തിനാൽ തോമസ് (57), കണ്ണൂർ ഒറ്റപ്ലാക്കൽ അരവിന്ദ് (38), ഭാര്യ കൊട്ടാരക്കര ചെപ്പറ മഹിതാ മന്ദിരത്തിൽ മഹിമ (26) എന്നിവർക്കാണ് പരിക്കേറ്റത്.
കാലുകൾക്ക് പരിക്കേറ്റ മൂന്നുപേരേയും കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ബുധനാഴ്ച ഉച്ചയ്ക്ക് 2.30-നായിരുന്നു അപകടം. അടൂർ ഭാഗത്തുനിന്ന് പന്തളം ഭാഗത്തേക്കുപോയ തമിഴ്നാട് രജിസ്ട്രേഷൻ പിക്കപ്പ് വാനും പന്തളം ഭാഗത്തുനിന്ന് അടൂർ ഭാഗത്തേക്കുവന്ന മിനി ടെമ്പോയുമാണ് അപകടത്തിൽപ്പെട്ടത്. ഇടിയുടെ ആഘാതത്തിൽ ഇരുവാഹനങ്ങളും തമ്മിൽ കോർത്തിരുന്നതിനാൽ മിനി ടെമ്പോയിൽ കുടുങ്ങിയവരെ പുറത്തെടുക്കാൻ പ്രയാസപ്പെട്ടു.
തുടർന്ന് അഗ്നിരക്ഷാസേന സ്ഥലത്തെത്തി കട്ടർ ഉപയോഗിച്ച് ക്യാബിൻ പൊളിച്ചശേഷമാണ് പരിക്കേറ്റവരെ പുറത്തെടുത്തത്. അടൂർ എസ്എച്ച്ഒ ശ്യാം മുരളിയുടെ നേതൃത്വത്തിൽ പോലീസ് സ്ഥലത്തെത്തി രക്ഷാപ്രവർത്തനം ഏകോപിപ്പിച്ചു. അപകടത്തെത്തുടർന്ന് എംസി റോഡിൽ അരമണിക്കൂറോളം ഗതാഗതം തടസ്സപ്പെട്ടു.
adoor accident
